|
|
5月13日 هلا وغلا بالجميع
اي واحد يدخل السبيس يكتب كومنت .. اي كومنت لو يكتب كل تبن اهم شي يكتب .. بشوف وش هالناس اللي تدخل
12月27日 ماهو سر المسرح الروماني والاحتفال السنوي للجن ؟؟
وهل يستطيع متغربل تخطي انبراشات الجن عليه ؟؟
وكيف لاا وقد اعتمدوه البشر سفيرا للنوايا الحسنه والغير حسنه
وهل ستكون الاحداث مصاحبه لحركات متغربل الفاهره والتي تعودنا عليها دائما؟
ماهو الذب ؟ وكيف استطاع الجن تعلم ذلك ؟؟ علل طيب اتحداك !؟
كل هذا واكثر تجدوه في ....
>>>>قرررريـــباااااااااا<<<<
14.05 بتوقيت مكه المكرمه
<-- ترفق ياالجزيرة اون لاين! 11月2日
بسم الله والحمدلله على كل شي
من زمان جدا مره ماكتبت شي .. يمكن لاني كل مادخلت السبيس احس اني غريب فيه وان هالسبيس لشخص ثاني غيري انا .. استغرب من نفسي اني كاتب كل هالمواضيع وفيه كل هالافكار وكل هالترتيب .. واستغرب من الترتيب اللي موجود بهالسبيس !! فعلا يا اني كنت مبدع وانا مدري ..
---
--
يوم اني رحت لكندا كنت حاط في بالي اني برجع للسعوديه واكون زي ماكنت .. بس للاسف ماقدرت .. بين كل حين وحين ضايق صدري من حالتي هذه .. وهالشي هذا اثر في اليوزر متغربل .. ماعاد له الحس الاولي اللي يمتّر المنتديات اولها وتاليها .. الانسان لا ادمن على شي في فترة معينه شاف فيها عز وعرف فيها قدر نفسه وشاف فيها مواهبه وفجأه ينتقل لحياة ثانيه فيها ثقافه وتعامل ونظام ماقد شاف زيه وعاش بوسطه وذاق حلوه ومره .. بتتغير افكاره وتتغير اساليبه واهدافه .. ويشوف ماضيه انه ماضي منغلق وحتى لو كان ماضيه مليء بالانجازات بيشوفه انه ماضي لازم ينترك وينحذف ويتنسي ..
استغربت كثير انا هههههههههههههههههه .. اذكر واحد من العيال كان ولا زال من اروع اخوياي .. كنت اعتبره زي القدوة لي بالنسبه لتعامله واسلوبه مع الناس وطرحه للافكار .. راح هالولد لامريكا فالبعثه وجا اجازة شهر وقاعد يكلمني ووش سوى ووش فعل .. الولد كنت اشوفه قبل لا يكلمني عن نفسه بامريكا كانه مبنى التجاره العالمي قبل السقوط من زود ماهو محترم وخلوق .. وبعد ماكلمني .. صرت اشوفه كانه المبنى نفسه لكن بعد السقوط .. ! فقلت له .. يعني انت خربتها بامريكا ؟ قال يا بن الحلال تراني خرباااان من يومك تعرفني بس اني كنت ساكت والحين ماهمني شي .. انا حر بنفسي واقول اللي ابي وماعلي من احد من اليوم ورايح .. ( هههههههههههههههههه كفو يا حرية ) طيب وشلون كنت خربان من يومي اعرفك .. ؟؟ والله يابن الحلال عندي قيرل فرند وماخذين راحتنا اناوياها ... قلت له قيرل فرند بالمعنى الامريكي ولا المعنى السعودي ؟ قال بالمعنى الامريكي .. قلت انا ههههههههههههههههههههه كفو يالامريكي ..
مشكلتي اني انسان طيب مره وحبوب واصدق الكذبه .. وبعض الايام اشره على نفسي باني اكون كذا .. لان بعض المرات تكون هالصفات هذه صفات حمار .. خاصة اذا تكللت هالصفات لناس ماتستاهل الكلمة الطيبه حتى ! .. ادري ان محد فاهم شي .. بس هذه كلمتين كانت بخاطري .. ولازلت على الهزاز ونفسيتي مهيب مربوطه ..
أعمــــااااال صـــيـــــانـهـ
-
-
|  |
1月21日
وش يسوون ذولي ياربي ![]() 1月9日
راحت ايام وجت ايام والناس يكبرون وانا اصغر وحاط حيلي بهالسبيس الضعيف .. من تالي رحمته وقسم ماغير اضيف بلوقااات لين ماتغرت الصفحه هههههههه .. اليوم غير عن كل يوم .. اول شي .. شرايكم بهالصورة ؟؟
هالصورة ذي مصورها واحد من اخوياي وهي مكبره للضو اللي شبيناه يوم نكشت بالشرقيه خخخخخ بس الصراحه عز الله انها صورة بنت كلب مدري شلون زبطها .. وطبعا مسوي لها حركات انا بالفوتوشوب اضاءة وتمويه وخرابيط .. على طاري الفوتوشوب تذطرت اني مسوي تصميم لعيال اختي الزلايب ههههههه لا والله انهم تحف من جد بوريكم اياها
هههههههههههههههههههههه موب عاقلين تيمون وبمبااا .. ياحليلهم تراهم صغار بس اجسامهم جحوش وكل واحد مسوي فينا ازمه .. اللي عاليمين ذااا تراه شين يحوم الكبد بس مدري شلون طلع بهالصورة مهضوم شكله عنده واسطه بالفوتوشوب خخخ اما الثاني الله يرحم حاله شين خلقه وخلاقين .. ومن شاف ميلة هالخشه ماوده الا يتفل بوجهه .. يا حبي لهم والله اني اعزهم مثل عيالي .. ايه قاعد ارفع لهم وش تبوني اسوي بعد لاشافوا هالسبيس وشافوا صورهم والله اني يكتموني بريحتهم هاللي تقل ريحة دم عنز مفطره على تبن ههههههههه
ههههههههههههههههههههههههه والله وطلعت الفضايح يا كمخه انت ووياه .. واحد متقاول مع شركة سيراميك وطني على هالخشه المتواسيه .. اعنبو حيه قسم بالله اشك ان الجراثيم بوجهه مسوية صالة تزلج على هالسعه خخخخخخخ
اما خوينا اللي عاليسار ذااا .. هو من جد شكله يخوف ويخرع واحتمال تحلم فلم مرعب بالليل من وجهه .. بس قلبه كبير مثل خشمه .. لايغرك الاسلوب بالتصوير .. الله انه ماعندك احد مثل اللي جمبه ..
مااقول الا ياحليلكم يا .... و ....ههههههههه
ويالله قم انت وياه واحد يجيب لي مااء والثاني يجيب لي مويه وافصخوا نظاراتي خخخخخخخخخخ
==== 1月7日 << أقــــلام جـــافــة >>
عندما تملأك الحيرة وتتراكم الهموم ..
فتمسك بالقلم معبرا ..
عندها تنفتح السيرة وتطيب السموم ..
ولكن..
كيف إذا كان القلم خائنا ولم يكتب .. وتغرقه بالحبر فلم يسكب ..
هل تعالى وتجبر .. وعن الكتابة تكبر !؟
يصيبك الضجر .. فالقلم قد فجر ..
ولأمرك قد نكر .. وبالبطالة قد أمر!!
قلمي عزيزي ..
ألا ترحمني فاكتب بك .. يا أنيسي وصديقي..
عبر لي وسأسعد بك
لم يكتب ..!!
فينطق القلم..
وموته على شفا حافة..
لن اكتب مهما كانت الأسباب كافة..
فأنا بريء من العقول الجافة.
بدر السلام عليكم ورحمة الله
شلونكم ؟ ادري والله اني بالشكم بهالسبيس كل يوم حركة وصورة بس عاد وش اسوي المنتدى مخترقه لي اربع ايام ومتوهقن فيه مدري شلون ارجعه لحالته الطبيعية .. عاد هذه بربستي بالسبيس عسى الله ينفع بنا وينفع بكم ..
الدشير ونافخ الكير
منذ نعومة أظافري وأنا احلم (بتكفيخ) احد الطلبة أمام الجميع فيبادرني الضحية بالبكاء والتوسل إلي بالعفو والرحمة لاسيما يأتيني هذا التفكير وأنا اجلس في المقعد الخلفي للفصل بجوار جبابرة الرجال وأشباه الأبطال .. فكان حلمي أن أكون داشرا يهابه الصغير والكبير والقوي قبل الضعيف .. ولكن صغر جسمي وقصر قامتي باتت حائلا بيني وبين أمنيتي .. فعزمت المضي في هذا الطريق رغم المصاعب التي ستواجهني .. حيث بدأت بالتمرّن على الحبل ليلا ونهارا وأخذت اقرأ الجرائد الواحدة تلو الأخرى (فاهم الدشارة غلط ! ) وذات مرة جمعت أبناء إخوتي عن بكرة أبيهم و(حجرتهم) في غرفة صغيرة .. (وهاتك يابقوس وكفوف من كل جهة) فلم أرى منهم غير الصياح والنياح والخوف والوجل .. فرحت لهذا المنظر كثيرا .. ومن الغد ذهبت إلى المدرسة واعترضت لطقم الدشير القاطنين في آخر الفصل فقفزت عليهم وكأني بذلك النمر يهجم على فريسته حيث كانت تلك القفزة مفترق طريق بين الخشونة والنعومة.. وأكون أو لا أكون .. ولكن المصاب ما حدث .. حيث لم أدري عن نفسي إلا وجهاز المغذي معلقا فوق رأسي والكمادات لازمة جسمي الملطخ بالكدمات والخدوش (أما خدوش ذي مهيب صاحية لا يكون الأخ ساعة سيكو ! ) .. حينها علمت بأن الدشره لا تأتي بخير ! .. حيث أهملت بنفسي الكثير من استخدام العقل والتفكير .. وتركت الصحبة الصالحة وانشغلت مع نافخ الكير .. وبالعضلات والألفاظ أنا قوي وكبير .. ونسيت بأن الله من المصائب هو المجير .. ولكن إخوتي باستخدام العقل تتغير الموازين وتتلاشى الهمجية وننطق باليقين .. 12月19日 <<<< قمــة التحدي >>>>
في دجى الظلام وسكون الليل ..
ومع صوت الريح الشديد والبرد القارص ..
تغمض عينيك ليزداد الظلام ظلاما ..
فيظهر لك ثقب في جدار الحياة يشع منه نور خفي
وتقـترب منه لترى من خلفه عرض لشريط الذكريات ..
فـتنسى ما أنت عليه من خوف..
وتتأمل ما به من صور ومواقف لا تـنسى مع أناس كانوا لك منهاج في الأخلاق وفن التعامل ..
فـتتذكر الأوقات الجميلة التي قضيتها معهم فـترسم على وجهك ابتسامة تنير بها ذلك الليل الكاحل ..
وتسعد أكثر حينما تراهم يبادلونك إياها بقلب حنون وإحساس صادق ..
ولـــكــن
تتلاشى تلك الفرحة حين ترى أن الشريط على نهايته ..
وبنهايته ينتهي أولئك الأحباب
فيرحلون عنك وتبقى الابتسامة التي رسموها على شفتيك ..
وعندها تنقش على الصخر بقلم الأحزان ..
قــمــة التحــدي ان تبتسم وفي عينيك ألــف دمعــة ..
ألف دمعة لك يا أبي –رحمك الله- 11月17日
سلام عليكم .. شلونكم اليوم ؟ طيب بكره ؟
بصراحه في البداية احب اهني نفسي على افتتاح السبيس .. واحب اهني الملك عبدالله على سبيسي الجديد .. واحب اهني الشعب السعودي على تاهل المنتخب واللي ابصم بكل اصابيع رجليني واصابع اخوياي واصابع الشعب العربي والمسيحي والبوذي والايطالي انه بياكل تبن مخيس في كاس العالم .. يحليلهم اجل مصدقين انهم قويين الله يرجهم .. انا بصراحه ودي اخش على الوزير حقنا واقوله .. تكفون لحد يهاجم خلوا الدعوه كلها (اللي يهاجم رخمه واللي بالوسط كمخه واللي يدافع يصك رجلينه لايجيه كبررري واللي يحرس يستقيل ويقدم على وظيفة قفازات بمحل الفالح للرياضه
خلونا بالمهم بس بلااا رياضه بلاا هم
كل واحد .. طلع من بطن امه (لايشييخ!) .. وكل واحد درس بالمدارس وصار كبير (إلا على طاري الام .. خخخخخخخخ اخبر الوالده الله يطول عمرها تقولي .. هنّك تدخل الانترنت بالليل ترى مايدخله الا اللي الله يايخوفي بس .. ههههههههه يحليلها الوالدة تحسب النت شاااارع توه مانورته الحكومه)0
وكل واحد تمر عليه السنين ويتغير شكله .. اخبر يوم اني صغير واول مره اشوف نفسي بالمرايه شهقت وسميت على وجهي على طووول ومادريت عن نفسي الا وانا خاااتم القران وتافلن حووول جركلين مويه كلها سعابيل على خشتي .. من جد يعني تخيلوا معي في عام 1406هـ كانت هالخشه موجوده في استديو منال للتصوير
ياوليييه ياناس على هالدميجة تقل خزااان يسورب ملح وبراءة وسباهه بوقت واحد هههههه
يوم كان هذا وجهي كلن يحسدني عليه تقل معي بي ام دبليو خخخخخ واخبر العالم يجون عند ابوي يطلبون منه جينات وراثية عشان يحسنون نسلهم بس ابوي كان رافض واصلن كان مجمع جيناته كلهن ورابطهن بكيس وحاطهن بالفريزر وكل مابغى يجيب عيال يغمس اصبعه بالكيس همن يمسحه بملعقه وتجي الوالده وتلهمه مع اثمها وبكذا يجيبون عيال بدون تعب او ترويش او تضييع وقت .. ههههههههه شيّاب اعوذ بالله الواحد ماتدري عنه عنده خطط واساليب قناة اكس اكس ال ماتدري عنها خخخخخخخخخ
المهم .. بعد سنة تورات القصص ونبتت الاشجار وترعرع الورعان واصبح الجميع يمارسون الرياضه .. حتى اذكر بالحارة كانوا يسموني العيال صفوق التمياط خخخخخخخخخخ ..بس من يومي وانا احب الهجوم والزقرت والرجاجيل والقعده فوق السيارات واني احب اسوي اللي ابيه ..
<-- تحسون انه بزر عربجي وراعي مكتب عقار وسيارته بيوك قديم لونه اسود
ههههههههههههههههههه عمري حول سبعه سنين بهالصورة وتلاحظون ان الوجه بدى يتغير وملامح الزقرت والعربجة سوت هجمة مرتده على وجهي حتى اني من زود الرجولة رحت اقدم على الابتدائي بلحالي بدون مايروح معي ابوي خخخخخ وكنت لابس شماغ وعقال وشايل ملفي بيدي .. حتى اذكر اني كنت لابسن كبك ههههههههه ويوم شفت المدير حق الابتدائي سلمت عليه عرب وجلست بالمكتب وسالته عن الاهل والاخوان عساهم طيبين هههههههه .. من جد يعني تغير وجهي الله يصلحه صرت كني راعي مزايين وحليب خلفااات .. وانعفط بالوسط غدى تقل مغسلة ههههههههه خطر ما تجي الاذن الوسطى بدل مكان خشمي .. واذا شفت هالصوة تحس اني مصورها فوق شبك بعارين وجنبي حاااشي يناظر عدسة الكاميرا .. ياحليلي وانا صغير احس اني كنت ارجل من الحين ههههههههههه تصدقون عاد لو يشوفني هالصغير الحين يتفل بوجهي .. من جد والله وين كنا وين صرنا .. من اول نزور الناس ويزورونا .. ويجون الناس بيتنا بدون مواعيد .. وبالعكس كنا نفرح لا جانا احد .. وكنا نروح للناس وننام عندهم والاخلاق زي العسل .. لكن الحين الله يخلف بس .. اصلن محد صار يطق باب بيتك ابد .. هالزمن تغير وتغيرت الاخلاق معه (بالله على هالسطرين ذي ماتحسون انكم دخلتوا سبيس طارق الحبيب بالغلط ؟ هههههههه )0
حياكم الله وياهلا فيكم
والسلام عليكم
مــتــغــربــل
11月16日
السلام عليكم
المواضيع الاربعه المكتوبة تحت .. هذه كنت كاتبها قبل الطفرة .. ودورت عليها بالانترنت ..
مالقيت لها روابط .. عاد جبتها من الجهاز ونزلتها هنا .. اغدي عيالي لاكبروا يلقونها تحت حدى جدران هالسبيس ههههههههههه
>>>>><<<<<<<<<
حدتنــي الاقــداررر إني اشتغــل جــراررر...
بسم الله الرحمن الرحيم
مقدمـــــة
عندما يهل نسيــم الصباح مهفهفــا أوتار حلودز العصافيــر ومعلنن عن بدايــة يوم جديد فيه نعيش نحن وإياكـم قصــة معاناة ذاك الفتى الاطخــم الذي ما إن رآه أي احد الا وتلاقي خشتــه غدت كبر لوحــة الرياض 860 كيلو قدام <<< ايه اتضــح اني من تكارنـة مكه الحين ,, وهو الفتى الذي فقد ابوه وامـه واخوانـه بعد حريق بالبيت لعـن والدي والديهـم ,, لا أود أن أطيل عليكم لأنكم خابرينـي وسيعن وجه وما انعطى فرصــه وان عطيتوني سوف تصير تسلل وينتهـي الموضـوع باالاشواط الاضافيــه ويتعين وجود ضربــات ترجيــح ,,(لابد من المصــاله بكل مكان )
القصـــــــة
عند اشراقة شمس ما ذاقت النــوم ابد ,, وبعد بزوغ فجــر توه اللي صاحــي من سكرته ,, عندها أطلقت الطيــور العنان لأنغامهــا لتفيق ذلك الفتى المنجطــل على السرير الواســع بداخل الغرفـه الفارهــه فتقول ,, هياااا ايها المملوح قم هداك الله قم ترانا ماذقنا شي من غدا حق امس ,, فيرد على تلك الأصوات بعد ما تغطى باللحاف قائلا ,, نعنبو ابليس من شراكم من عند الاشــاره وحطكم بحديقتنــا قسمب بالله لا اقول لـ(طوني) انه يطردكم يالحميــر ,, فيرجع ذلك الفتى الى النــوم بعد ما لقطت الطيور وجهها تلى ذلك قشهــا ,,
(((ان هذا الفتى فيه صفات يطيح حلدزي وانا اقول (خققــوا معه ) ,, فهو وردي البشــره ,, لامع العينيــن ,, اشقر الشعــر ,, ناعم الملمس ,, ذا صوت بحــوح ,, وزودن على تسذا فهو رخمتن قاعده ,, واشين مافيه انه اذا عطس لازم يسويها (يطقــ ..) ))) ,, وبعد برهة قليلة من الزمن تصكــر المكيف و أسدلت الستائر ليشــع نور الصباح على عيني ذلك الفتى معلنن عن قدوم الخادمــة ( مارينا ) وبيدها فوطة بيضاء صغيره لتقف امـام السريـر وتنادي بصوتها الحميم ,, هيا يا درة الدنيــا ,, هيا يا مــلاك الأرض ,, هيا يا قــرة عين امك قم من النوم الله يصلحك قل امين ,, فما كان من ذلك الفتى الا ان يحرر ايدينــه وعصاقيلــه وينهض من السرير تبع ذلك تمغيطــه طقت عظم ظهــره امام نظرات مارينــا المارجــه الذي كان لسان حالهــا يقول ,, تسيف ماطحت برجال مثل هالاطخم ,, فقال الفتى وش فيتس يا مارينا تناظرينــي كنك أسد يبي ياكلني ؟ فقالت لا وشدعوه ياحبيبي لا تخاف انا مااكل احد انا جيت ابي اعطيــك فوطة لكي تنشف وجهــك بعد ماتغسلــه ,, فيرجــع لسان حالها ويدق ريوس ويفتح الدريشــه ويقول (الله لو تتنشف عقب ماتتروش كان اطلــق ) ويصكر الدريشه ويفحط <<< قسمب بالله هاللسان يبي من يقطه بالقراشيع ,, فقال الفتى اوكي مارينا هاتيها ويالله اندزلعي خليني اخذ دش ,, فذهب الفتى الى الحمام (اعزكم الله ) وخرجت مارينا من الغرفه بعد ماقــزت شوي من تحت البــــاب.....
نعم ايها القوم ذلك الفتى هو انا ,, احكــي لكم مافعل بي الزمان من تقلب للاوضــاع والاوجــاع ,,
خرجت وانا انشف شعري من المــاء وذهبت الى الشرفه (البلكونه) حيث وضعت الحاله بالخــارج ,, لاستعيد ذكرياتــي الغائــره في عالم القردنه والمراجــه بعدمــا رايت احد العصافير مازال يلقط وجهه عقب سالفة (يالحمير) ,, حيث تصادمت الذكريات هنــاك وقعدت كل واحدتن منهن تلعن بالثانيــه وتقول الغلــط عليتس مهوب علي,, نعم انها ذكريات تتصارع من اجل البقــاء حينها اتذكر يوم طلعت من بطن امي وكان السسترات يتهافتن علي بالورود تسني امير يفتتح مستشفى ,, وحينمــا ترعرعت وتدغبجت في ربيعي السادس تذكرت حينهــا اول عزيمه للعايلــه في احد الاستراحات وكانت تلك الليلــه شؤم كبير على امي ,, حينمــا قام مجموعة من البنات الصغيرات باختطافي والهروب بي الى داخل المزرعه وفعلوا بي مالا ادري ,, وحينمــا وجدتني امي في احد احواض النخــل متمردغن فيه جردتني من ملابسي لتعرف ماذا حصــل ,, فوجدت مكتوبن على جسمي ارقام هواتف وعبارات لايسمحلي المقام لذكرهــا ,, تبا لهم اولئك القذرات لماذا لم يشتروا دفاتر ليكتبوا مايبون مالقوا الا جسمي يكتبون فيــه , ولكني لن انســى هـاك الحين انني فطست من العجب !! حينما قرأت في ساقي اليمنى عباره مكتوب فيهــا ( لاتنسانا من دعائك الصالــح !! ) ايقنت آن ذاك أن ابنت خــالتي الملتزمــه كانت من ضمن المجموعــه الخاطفــه ,,, من جد يا لهدارتهــا ,, واتذكر ايضا عندما كبرت قليلا خرجت للعب مع عيال الحــاره ولكني لم اصمل لمدة طويله الا وانا راجع البيت متصفق ومتبهذل ,, حيث انهلــوا علي بالضرب بزعمهــم لم استر عورتــي لانني كنت لابس شورتاً ,,, ولكن حينها فطست من السباهــه عندمــا كانوا يرافسونــي برجولهم حيث حسيت ان لكل واحدن منهم له ثلاث ارجــل .........
لم يوقف تلك الذكريات على البلكونه الا هــزة ارضيــه قامت بهدم المنزل واحداث ضجــه في المدينه واصبح محاتسيكم من ضحايا الزلزال ومات وانتهت القصــه !! خخخخخخخخ تبا لي يا لمصالتي انني امزح (لاعاد تعود لها يالسبيكه )
لم يوقف تلك الذكريات الا موجه حااااره جدا تبعهـا لهيب احمـر ومعلنن عن حريق خاطم من الصاله وداخلن على غرفتي بعدما قضى على البيت كلــه ,,, لم يكن بوسعي الا ان ارفع يدي اليمنى وانط من البلكونه مقلدن بتلك الحركه سوبرمان ,, وفعلن تغلبت عزيمة التقليـد على غريزة الخوف وطمرت على الحوش ,, صحيح اني اكلت تبن لكن اشوا من اني اصير كهشاشة ورق من مخلفات بزران لاعبين بولاعــه ,, فخرجت مسرعن الى الشارع العام (ماجاب خبر لاهله قايلين لكم رخمة متربع ) ,, وااشر لباص كان ماشي واركبــه همن قعدت جمب السواق لان مافي مكان الا جمبه وكان شنبه كبير تسنه واحد عــاض له قنفذ ,, والباص كان كله دشيــر وعرابجــه والتفت علي السواق وقالي ترااا الحريم ورااا يابنيتي ,, قلت له انا رجال وهو اللي ينلخــم ,, وبدا كل شوي يناظرني همن يناظر قدام يناظرني ويناظر قدام قلتلــه وش فيك انت مغير تشوفني تقل شايفلك فار يتتن .لايكون مشبه ؟؟ قال لاااا يا الغالي بس حبيت اتاكد من الوضع المهم وش رايك تجي تســوق ؟ قلت له ماعرف اسوق ,, قال ميخالف انت بس امسك الطاره وانا اعودك ,, قلتله اصلا انا مااطول البنزين ,, قالي يابعدهم يادلبووو انت اجلس بحجري وانا ابدوسلك بنزين هاا وش رايك ؟؟ ,, قلت
لاااا معصي شايفني لاب توب ,, وانا اللي اشيل اغراضي وارجع ورااا الباص عقب ماشقق ثيابي هذاك الوع اللئيــم السواق بزعمه يبي يقنعني انه احسن من دلــه (والله السب واللعن ولا شقشقة الثياب... )
ويوم رجعت لاخر الباص تقل يوسف الثنيان دخل الملعب طــااااروا بي هالدشير وانا معطيهم اشكل ,,, جلست وراا وشنطتـي على حجـري ولام رجليني على بعض ويجيني واحد خشمه كبيـر على قدام غادي تقل وجه حمــار ,, ويجي ينغزني من كتوفي وانا اوخر عنه وهو ينغز وانا اوخر وهو ينغز لين مالزقت عند الدريشه وعصبت همن صرخت صرخه كل اللي في الباص صرخوا وراي (تقل ذاك الرجال اللي كان يشجع الشباب همن حولوه للهلال ) ,, انا وصلت معاي خلاص ماعاد صرت اركز من زود الحركات (الوسخه ) اللي يسوونها العيال ,, اللي يقبصني واللي يجي يبوسني همن يقول اسف احسبك رضا تكر (ماتمبلع من جد) واللي يقولي وش رايك نلعب حبشه ونتغبى تحت الكراسي واللي يتهاوش عشان يتأسف مني ويبوسنـي ,, انا بذيك اللحظـه تاكدت ان المملوح بالسعوديـه مايعيش ابد وقلت بروحي لازم اسافر باي طريقه ,, وانا اللي انقز من الدريشه والباص كان مسرع واقعد اتدردب بالردميـه لين ماقمت وعدلت نفسي ,, واشوف روحي توسخت شوي وع وش هالقرف الموحلووو طين وتربات ,, فجاة لقيت كل الدشير اللي في الباص نقزوا معي تقل من هاللي ينقزون من الطيارات بالبرشوت بس الحمدالله كل مانقز واحد يا تدعسـه تريله ولا ينشب بالدريشـه وفيه واحد نحيف وقصير يوم نقز طار مع الهواا ولا عاد شفته ,, ويوم درا السواق اني نقزت قام هو ونقز بس ماش خانه التوقيت يوم ينقز اثره طايح بحفريات ,, والحمدالله ماعاد صار فيه احد يضايقني ......
وجيت ابتصل بالجوال على اهلــي (بدري ؟ ) بس ماش اثري ناسيه ,, ويمر ددسن فيه اثنين وجيت واشرت لهم والسياره اللي تنطل يمين وتنقلب (الظاهر انه بلع الجلنط مع السحبة ) ويطلعون لي اثنين خششهم تربات من الغبار ومن زود السعابيل الي فيها غاديه تقل صدام هايلكس طالع من وكاله ,, واحد منهم دب والثاني معصقل يعني لو تشوفهم من بعيد تقول رقم عشره بالانقليزي (لاعاد تشبه تكفى),, ويجي الدب يقول هاااا سم امر تدلل ناقصك شي شفيك تشر ؟!؟ قلت له والله ودي اتصل بالجوااال ,, وهو اللي يلزق بخشتي ويقول ياخلفهم اصير لك جواااال ,, فجاة طاح اثر النحيف ناطن عليه وهو يصارخ وانا برج الارساااال ,, همن سكت فتره وناظر باخوه الدب ويقول ,, هه شفت اني حليل ماقلت اني شاحن الجوااال ,, انا تحمدت ربي وحبيت ايدي وجه وقفى ,, قال النحيف ليتني برطم بوجهك يابعد كوعي ,, ويجي الدب ويشوت وجه اخوه همن يلتفت علي وقال والله ماودي اصير ايد من ايديك ادام ذيل العنز برطم من براطمك ,, انا تركتهم وصرت امشي مدري وين اروح ويأست من هالدنيا و اصيح طول يومي ,, وهذولا تركوا ددسنهم وصاروا يمشون وراي وكل مااروح مكان القاهم وراي تسننا ملزومين لبعض ,, والمشكله انهم يسوون حركات مدري وش تبي اللي ياشر بيده واللي ياشر بلسانه وانا فاهي مااعرف وش يقصدون ,, لين مالزقوا عند وجهي حسيت اني ابعطس يومني شميت ريحة اثم الدب هاللي تقل بالع جرذي ميت ,, وانا اللي اعطس همن سويتها...... ,, والاثنين اللي كانوا لازقين بخشتي هجوا من الريحه (تكفون يالنظاف اقول تعالوا بس ) ويوم جوا لمي تغيرت نظرتهم وصاروا يعصبون علي وكرهوني كله بسبة الريحــة ... ,, عاد انا صرت اتلزق عندهم اتشحذهم يسكنوني ببيتهم ,, وهم يعيون يقولون لو نمت عندنا بالليل كل سرابيت الديره طوابير عند الباب تقل مقصف ابتدائي بس محد داري عن ريحك هاللي تقل غرفة تفتيش ,, عاد انا صرت اترجاهم وانقز واتشبث بهم واحب روسهم كل ذا عشان اسكن عندهم لاني خلاص فقدت اهلي من بعد الحريق ( ياشين اللي مالقاله صرفه بهالاهل )
قالوا الاثنين لحظه شوي خلنا نجتمع همن نرد لك خبر ,, ويروحون بعيد بس اني اقدر اشوفهم واسمعهم وهم اللي يتطاقون ويفلقون بعض وكل واحد يتفل على الثاني نعنبو ذا التفاهم اللي يسوي كذا ,, والمشكله اني سمعت واحد منهم يقول للثاني يلعن امك اسمعني زين عاد رد عليه اخوه قال لاتسب امنا الله يلعن ابوك ,, بس والله ماطولوا ورجعوا لي وهم معرقين وحالتهم حاله تقل واصلين من سباق اختراق الضاحيه ,, فقال الدب ( هالدب ذاا عليه جسم تقل واحد يطل من ورااا ثلاجه ) شف يابو الشباب حنا اجتمعنا وتفاهمنا واتفقنا اننا نسكنك معنا بشرط انك تشتغل ,, قلت والله ؟؟!؟ ايييييه مايخالف وش ابشتغل ؟,, قال تشتغل جراااااار ,, وربحك عشرين بالميه وانا واخوي كل واحدن منا اربعين بالميه ,, قلت بس وش يعني جراااار يعني اصير مجرور بالكسره هههههههههه ,, وهو اللي ياشر على بطني ويقول وش ذاا ؟! وانا التفت على تحت وهو اللي يستقبل وجهي بركبته مع نظره تقول اترك عنك شغل مامي وباباه واهرج صح يملا الشفاط اللي يسحب ريحتك ,, ويجي يمسك قذلتي ويجرني ويقول هي شغله بسيطه بس فيها تعب شوي وتراها على حسب صبرك ,, بس ماعليك حنا راح نساعدك على هالشغله لين ما يركز عودك ,, قلتله يامتوحش تراني مافهمت وضح اكثر ,, وهو اللي يغمز لاخوه مثل اللي يقول رح جب العده ,, وانا صرت اتراجف وصرت بخلوة مع هالدب وهو يقعد يناظرني ويتمقل فيني ويجي يلمس كتوفي ويفعصهن همن يسدحني على بطني ويشوف رجولي ومالقى بهن شقوق ,, بعدين وقفني على رجولي وقال انت مو ناقصك الا انك تسمن شوي وينفع الشغل (يحليلي حسيت اني رادو عقب هالدردبه )
جاا اخوه المعصقل وجاب معه العده ووجه منشق من الوناسه ,, همن وزاهاااا ورا الدب يازعم انه مايبي يوريني ,, انا بذيك اللحظه جاني شعور بالخيانه وانهم قاعدين يستغلوني ومهوب بعيد يسوون بي مثل ماسووا بنات الاستراحه ,,, بس قلت الشكوى لله ياولد هذا امر مقدر ومكتوب خلنتوكل على الله ونستسلم ,,, وجاني الدب وقرب لين لزق بخشتي همن قال رح استناني بالسطح ,,, انا وقتها خلاص كل جسمي عرق وبديت اتراجف بس مامنع اني اطلع للسطح اللي كان مليان كراتين خضرة وفواكه!! ,,, وقعدت انتظر الدب لين وصل همن قالي يالله استلم الشغل ورمى علي عربيه ذات كفر واحد ( حلوة ذات ذي تقل جايتن غلط ) ,,, قلت له وانا ابلع ريقي ووش اسوي بالعربيه ؟ قالي حمل الكراتين وجرها بالسوق تراا حزة العصر نبي نبيع ,, قلتله اجل وشي العده ؟ قالي وهو معصب واللي رميته عليك وشو ؟؟ احمد ربك اننا شغلناك جرار عربيه خضار مهوب جرار شي ثاني ,,, وترى وجهك ذااا هاللي تقل ممسوح بمنونيز هو اللي بيغنينـا بعد الله ,, انا وقتها ارتاح قلبي وهدت اعصابي وعرفت ان الدب قروي عقب ماقالي منونيز وصرت اشتغل ليل ونهارررر جراااار عربية خضااااار ,, وفتح الله علينا والحمدلله .....
النهايــــة
الدب اغناه الله وصار من اكبر مصدري الخضار والمنونيز .....
المعصقل توفى بحادث سيكل......
الدشير والعرابجه اللي كانوا بالباص كلهم صاروا مؤلفين كسرات ومن بينهم طلع بشير شنان.....
سواق الباص لاقين جثته بالحفريات وكلها حبوب شباب.....
الداشر القصير اللي طار مع الهواا يقولون انه صايده بزر بسكتون زاعم انه قميري قاعد يستهبل....
طوني ومارينا سرقوا دراهم اهلي وهجوا لديارهم وعشان تسذا اوروبا صارت اغنى مننا...
بعد التحقيقــات في الحريق اللي حصل بالبيت صكوا ملف الاجراءات والقوا التهمة ضد مجهــول.....
انا سافرت للبنان وسويت عملية تشيين وارتحت من عقبها وشلت من راسي اني اسافر عن السعوديه.....
بالاخيــر:- حدتنــي الاقــدارررر انــي اشتغـــل جــراررر عربيــة خضــارررر
ما يستفــــاد
- لاتكون دبشه وتقول ابي وظيفه راتبها اقل شي خمسة الاف ,, لانك بتضيع وقتك ان مادبرت عمرك
- الشغل بحلقة الخضار مافيه نص عيب والعيب انك تدردب على حضن امك ومخباة ابوك
- لحد يبلشني ,, لاني مااشتغلت للحين......
- الاعتماد على النفس لايفسد للود قضيه......
- القردنه :- هو علم يختص باستراتيجية جمع راسين مايصلحون لبعض .....
- المراجه :- هي النظره السلبية لاي حرف ينطق مثل أي مارج يشك بقولة ( يازين رد اللي تحتي )....
- التعريفين اللي فوق ترااا مدري عنهن زرفن بالموضوع وانا اغسل المواعين .......
- كيف الحال....؟!!؟
- <<<< كل تبين ... بثــارة اهــل نجــد في الوصول الى افاق المجد ( رغم مصالته لكني منزله منزله )
بسم الله الرحمن الرحيم
السلام عليكم
(((ذهانـــة اهــل نجــد في الوصــول الى افــاق المجـــد)))))
اهــداء الى كل من يحب متغربل ويخــاف على مصلحته <<< كل تراب تكفى
مقدمـــــــــــــــــة :-
قال المسفهــل في كتابــه "المواقف الفاصلــه ,, في بثــارة اهــل نجد الفاشلــه" والذي كــان يتحدث عن اهـل نجـد المرتحليــن الـى الحجــاز قاصدين للتجاره ,,, كتب في نهايتــه ( كفاكــم تذيهــن لعنبـو ابليـس من جابكــم على هالتميلح ,, لابوكــم لابو من كتب لكــم :mad ,,, فثــار فطاحلـة ادبـاء نجــد فــرد عليــه المنجطــل وهو احد اكبر الدشيــر والعرابجــه في نجــد كلهــا في كتابــه" الردود القويــه ,, على فضايــح المسفهــل القرويــه" قائلا ( اقول انطم ولايكثر تكفى ) <<< لاعــاد ترد بلا فشكلك !!,,, فتوالت الروايات والقصص منهــا اللذي اخذ مقلب ,, ومنها اللــذي فتح الله عليه بهالسفــره واصبح حظه كويس , وصار يشتغــل غني,,, فدعونــا نخطم ونبحر بدون كفر على احد تلك القصص عل هناك من يستفيد ويهون عن التميلــح وهالحركات ......(( عل :- بشد اللام <<< تقل ماله داعي اكمل الموضوع عقب هالكلمــه ))
القصــــــــــــــــة :-
كنت العــب انا وعيــال الحــارة في ذات عصر من الايــام ,,, وكنت قد تفلت العــافيه من زود حماســي باللعــب ,,, لدرجــة ان صراويلنــا غطــاها اللون الكحلــي من كثر العرررق لين ماصــارت يابســه تقل بسكــوت واذا رجعنــا للبيت نبــدا نكسرهن ونغطهــن بالشاهــي ,,, (شابوره ولا احلى !!) ,, وخياس روايحنــا إذا شمــه الادمــي جاه برص وعنقز مزمــن والله مهوب رايح لو يكب سطلين ديتول,,,
نكست للبيت ودخلته بكـــل هدوء وعنفوانيه حيث ما إن صكيت باب الشــارع الا واخـــي الصغير(دريهم) قد سقط من الطابــق العلــوي مجـاوبا جرة المــاء التـي بجانب امـي ,, لم يعطــي ايا منا انتبــاه لذلك لاننا متعودينن على هذا الروتين ,, ذهبت الى السطح لكي اويدز على شغالة جيراننا سومياتي كالعاده ( وياشين العاده ) حيث ان بنت الكلب كانت تنشر الملابس وهي مشمره ,, وانا كنت على وشك ان اخذ ملابسي واذهب الى الحمــام لكي اتسبح ,, ولكني لمحــت ابي قد دخل الى المنزل وهو ضايقن صدره شكل وجهــه تقل قــربــة ماااء معلقــة على صدام ددسن بدون شمعات ( لزوم الاحمر والاخضر !! ),, فنزلت إلى تحت لكي اشوف ماذا دهاه ابي من ضيقــة صدر هل من احدن صفقــه ,, او هك عليــه بشــروة ,, ام انهـــزم في مباراته بلعبة الكيــرم من ابو داحم ؟؟؟ كل هذه التساؤلات سوتلي شارع البراميــل في مخــي ,, ولكن سررعــان مااصبحت الدائري الشــرقي بعدمــا سمعت الحوار الذي دار بين ابي وامي حيث كان يدور ويدور لين ماداخ وطرش ودخل المستشفى ومات شهيد ...
ابوي (وقد اطلق تنهدات التعب على خشة امي) :- الله يهد بدن اللي طيحن فيتس ياشيخــه قولي امين ,,, !!
امي ( وقد وضعت كمامات على وجههــا من خياس ريحة اثم ابوي ) :- تبــا لك ,, وانا وش دخلن ؟؟
ابوي ( وقد تلثم بشماغه لكي لايزعج الجيران بريحتــه ) :- اقول زهبي العيــال والاغراض بنسافــر للحجــاز
امي ( بعدما لطمت وجهها ببقس الحقتها بسفلكس خلفـي متاثره بسماع كلمات ابوي ) :- سحقــا ,, و لماذا ؟؟( قايل لامي لا تكثرين تشوفين افلام مدبلجه )
ابوي ( عقب ماشــق الشمــاغ ولاعن ام الحــاله اللي هو فيهــا ) :- خلاص مانبي نجــد ,, نبي نسـافر نشوف لنا محــل رزق ثاني كوده الله يفتح علينــا مع اني داري ان وجهك وجه حوادث وفيضانات وضحايا بس الشكوى لله لازم ناخذ بالاسباب ,,
عنـدما سمعت تلك الكلـــماااات ,, قعــدت اصبخ راسي بالجــدار من القهـــر والحســره على الحــاره وعيــال الحــاره وشغاله الجيران,,, فرحت لبوووي وكنت ماشــي مليون طن بالسجــاده ( الله من المصــاله ) وقلت له ليه يايبه ؟؟ ليه نبي نسافر ؟؟ ليه الغربلــه وضيقــة الصــدر ؟؟ ليه اتخذت القرار الصعب ؟؟ ليه الكماخه بذاا الوقت ؟؟ ليــ .. لم يوقف تلك البربره الا ركله خطــافيه على بطنــي مع مسج صغير يقول ,, اعقل ياولدي وكل تــراب ,, بعد ثواني ضفيت وجهــي وطلعت للســطح مع ارسال ثلاثة ايميلات لبوي تقول كان فيك خير قابلنــي بالسطــح ,, وبعد برهــه من الزمن رجعت الى ابوي ,, فقلت له طيب بايش بنروح للحجــاز ؟,, قالــي والله محتار ياوليدي بين البورش والبي ام,, وش رايك نروح بالماي باخ ؟؟ قلت له خابرك ماصــل يايبــه بس مهوب لهــالدرجــه وش دعــوى يالوليد على هالنغنغــه ( ياشين اللي بيشارك دعلج بالورث ),, فقالـي والله ياوليدي مهنــا الا الحمـــار شبيهــك بنسافر فيه يشيل علينا بقشتنــا ,, قلتله وانا قد هممت بالقيــام لغرفــتي ,,,لايشييخ اقول طس تكفــى انت ووجهــك تقل واحد يصلي وجاه سهاااال ,, اجل انا وجهي تقل حمار ( الا يمحترم ابوي ),,, شــوي الا ويدق باب الشــارع واتوجـه انــا وافتـح الباب والقى حمارنا اللي بنروح فيه قدامــي ,, فقال تسني سامعــن طــاري حمــار بيروح معكم عســى مهوب انــا ؟؟ قلتله والله مالي شغل هذا ابوي انا ماقلت شــي ,, التفت على ابوي وقال خير يابو متغربل اشوفك مطيح الميــانه معي هاليومين تقل مزحــك بداا يثقـــل ,, قلتله ,, اقول احتــرم ابوي تراه بمقام والدك ,, التفت علي الحمار وقالي وهو يناظرني نظرة استحقار ,, أنت بالذات تلفقــه وتنطــم تراني مانيب ناقصن مرض يمشي على رجلين << يذب هالخسيس
الوكاد وحنا بالسفــر أنا وأبوي وأمي واخوي طاسين لم مكه جتني حشرجه تحت بطني يعني الشغله فيها روحه بهالليالي واتفصـخ واتبوبـز واستنظـف << امممما هالاخيره ذي كثر منها ,, والله ورحت وقضيت حاجتـي ويوم رجعت لاهلي لقيتهم مربطين بحبال وجمبهم اثنين لابسين اسود في اسود ,, قلت اكيد ذولي الحنشل ,, يبون يسرقــون متاعنا ( يارجال على تبن بس اللي يسمعك يقول معهم شنطة وزير ولا مفتاح البلده ,, اشوا ان متاعكم كله وزره لبوك وذيل ضب بزعمكم مؤنة للطريق ) ,, المهم اني قاعدن اراقب من بعيد هالحنشل وش بيسوون باهلــي ,, واشوف واحد منهم لسان حاله يقول للثاني ,, وش رايك بالام ؟ رد عليه لسان حال خويه وقال ,, ياشيخ كل تراب والله لو تتزوج بطانيه ارحم لك ,, رد عليه لسان حال الاول ,, طيب وش بنسوي بالرياجيل ؟ قال ,, ماعليك منهم ذولي اجدعهم بالدزليب ,, المهم وهم يتكلمون كذا جاهم لسان حالــي مسرع وسعابيله تقوطر يقول ,, خير انت وياه ,, الاخوان واقفين قدام بوفيه ولا بحراج سيارات ,, وش رايكم تاخذون متغربل وتفكوني منه قسمب بالله اكثر واحد متوذي منه لسانه اللي هو انا ( هين يا لســاني ان مالعنت خيرك وخليت ضروسي تهمزك مااكون متغربل ) انا من زود الخوف والرعشــه ماصرت اجمع لدرجة ان صوتي صاير تقل بربري بيذبح ,, وامشي قدام الحنشل تقل بعير ومريت من جمبهم قلت ,, يااخوان بالله في واحد شاف منكم مروحة تخبرون سفينة الصحراء ماتقدر تمشي بدون مراوح ولا وش رايك يابو الشباب تعطينن اذانيك يومين ابي اجدف بهن لين ما اوصل للحبشه ( الخوف ومايسوي ),, يوم شافوني كذا كل واحد باس ايده وجه وقفى ويقولون انا لله وانا اليه راجعون ,, علينا الحرام لو نسرق مال كمخ ودلوووخ ,,, وتركوا اهلي ومشوا بسبيل حالهــم
وصلنا لمكه واخذنا عمرتنا وقاعدين ندور علىعشه نسكن فيها ,, والله ولقينا جمب بيت واحد حجازي ,, المهم يوم نزلنا الاغراض وحطينا العفش جانا ابو جيراننا الحجازي ( اسمه حمزه ) يقول ,, اهلا وسهلا بالحبايب فاكر ياولدي يااحمد لما كلمتك عن الشهر الكريم ,, رديت عليه انا وقلت بكل بثــارة وسعة وجــه,, ايوا اتذكر يابويا ,, جاني ابوي وقالي طيب ماتذكر ياوليدي هاك الطراق اللي خلاك تلزق بالسقف ,, قلت انا ايه يايبه اتذكره ,, قال اجل انقلع وخلني اتكلم مع حمزه جارنا الجديد ,,, هااا ياحمزه سم ااامر ؟ ,, لا والله ولاشي بس حبيت اسلم عليكم ,,, تراك ياحمزه معزومن عندنا الليله ,, طيب شوكرن يابو غوغو ( يلعن اسم الدلع اللي كذا ) ,, بس لازم اهلك يجو عند اهلي عشان تصير وحده بوحده هههههههه ,, طبعن انا مسكت ابوي لايتهور الحين ويلعن جدف هالادمي هو ومصالته ,, والله ويجينا حمزه وحطينا عشاه واكله ويوم قضى قاله ابوي ,, والله مهوب حقك ياحمزه ,, شهق حمزه ونط عند ابوي وقال ,, والله ماكنت داري انا اسف سامحني حسبته حقي ,, ابوي ماقدر يستحمله وتله مع علباه ورجفه براا البيت (والله ياانت ماتعرف تقدر الضيوف يبوي ) ,, وجت امي من بيت الجيران وعيونها على وراااا وكل برطم من براطمها يقول للثاني انا اطول منك ,, قلت لامي ,, خير يمه وش بلا شكلك كذااا ؟ قالت ,, تصدق يا بو متغربل يازيييين بخور الحجز زيناه يشرب شرب ( امي شيشت ) ,, الوكـاد ان ابوي مااستحمل هالجيران ودورلنا مكان ثاني بعد ماحبس امي جوا حفرة المندي بزعمه دواء ضد الشيشه,,
وبعد مااستقرينا فكر ابوي بتجارة الشباشب ( وانتم بكرامه ) وفتحله بسطه على قده وصرت انا شريكه ,, هو براس المال وانا بالشغل ,, وتطورنا لين مافتحنالنا محل ,, ومره من المرات جانا رجال وولده يبون يقضون للعيــد ,, يوم اخذوا فره على المحل وانا كنت ارتب كم شبشب على الرفوف جاني هالبزر وقاعد ياشر علي ويقول بابا ابي هذا ,, بابا ابي هذا ,, انا بغيت افهمها غلط لولا ان الرجال راح لبوي وقاله بكم ذا النعال اللي ياشر عليه ولدي ,, ورد عليه الوالد ,, هذا الله يسلمك ولدي ولو تبيه خذه ببلاش واعطيك دراهم عليه بس فكني منه تكفى ( اثر البزر يحسب وجهي زبيريه ),, كل من جاااني بالمحل ترك كل النعول ويساوم على وجهه ,, قال الرجال وانت الصدز تصدق اول ماشفت خشمه ظنيته نمره 25 ,,, انا تحطمت نفسيا خلاص ماعاد ابي اعيش ,, وماعاد ابي ام ولا ابو ,, واشتغل فيني حمض النذاله ورحت وولعت على دكان ابوي وخليته يعض قفاه من القهر ,, ورجعت لامي وقلتلها تراك احلى من في الكون وجمالك يضرب بالطير وصوتك يهز المشاعر وعيونك تعمي الواحد ,, وانا قلت هالشي عشان تجيها جلطــه معويه من هالحتسي بعذرها مهيب مصدقه اللي ينقالها ,, وانا صرت اشتغل طرار عند الحرم والحمدالله ,, الله فتح علي بهالسنين وصرت اشتغل غني وابيع مخدرات واروج سوبيــا
تمت المصاله بحمد الله ومنه
بايو اول شي يا هلا والله وغلا بكل من لفى .
هللتم سهلا وتبطحتم سعدا .. ومرررررررررررحبن الف في اول موضوع لــي والظــاهر انه اخــر موضوع ,,,,, واحب اقولكم شيئين :-
الاول:- هو تراا ذاا اليورز ماله دخل باي منتدى ثاني يعني هنا وبس
والشي السااابع :-عاد امصعـــوا الاتصـــال بس تراه مهوب خوفن على قروشكم بــلا والله ماودي اكســب الاتصـــالات!!! ,,,,,
مقـــــدمـــــة:-
كم جميل من المرء ان يصمل ويغدى رجل فيرعص على ايقونة موضوع جديد فيبحر في سماء التحشيش والخنبقة والمصــاله في آن واحد ( من بدايتها تحكحك بالشامبوهات ),,,, لترتسم لنا لوحة جميله مكتوب بالزاويه من تحت عمل الطالب النجيب / متغربــل ,, الصف سادس جيم
القصــــــــــــة :-
عندمــا استيقظت من سباتي العميق بعدما ازعجتنــي زقزقة بعاريــن حديقتنا الغنــاء ناســي(ن) احلامي الجميلة والمتمثلة في اني ودي اصير كابتن فريق حارتنا ,,, لكن للاسف فهذا بعيد المحال مادام نوح ولد الافغاني حق التميس عايش بذي الحاره ,,, فلا يعصى له امر ولا يشار له برأي واذا في احد لعب بذيله فعصــى امره فله من التصفيــق والتكفيــخ والبلغــم مايستحق حتى يجعـــل وجهه تقل وجه عنـز به نفاااس ,,, ولكن بالنسبـــة إلي فلم يكن انصياعــي وتقديــري له لانه قــــوي ويحب تصفيق العالـــم والتفل على الخشش,,, ذلك اني قـاز(ن) اخته وحطيتهـــا في دميجتـــي علها تكون رفيــزتي وخويــت حياتـــي ,,, ( اقول دعونــي لا اكشح بعيدن عن سالفتــي ترى ذا الافغانــي لو ابهرج عنه طــرشت من خياس ريحته ). المهم انني تدربيت من سريري فسقطت مجاوبا للارض ووقفت فزعــا وتسنــي بذالك القطــو يتهنــى ويتغنى فوق زبالــة الشــارع واذ بالزبيريـه تلعن خير امن جابتــه ,,, كعادتــي درعمت الى المطبــخ لاتفحص ثلاجتنـا وفي الطريق نظرت الى غرفة ابي وامي ابشوفهم هم يفطرون على السرير ولا على الكومدينه لاني متعودن اجغــف رويساتهم كل صبح ... والله واقز من تحت الباب بس ماش مالقيت احد خافنهم فطروا على السقف ,,, وادرعم حتى وصلت الى المطبخ ,,, وفتحت الثلاجة والقى فيها فار رافع لوحة مكتوب عليها " الله يلعنكم من اهل حتى قراطيس مافيه ؟!!!". صكيت باب الثلاجه بعد ماوفر علي الفار فتح الدروج وتدوير أي شي يوكل انشالله لو انه علبة صلصــه ,,, لكـــي يوخر ريحة اثمي هاللي تسنها ريحة زوليه مكبوبن عليه موية صرف صحي .,
نكست ( يعني رجعت للي ماعندهم ثقافه لبنانيه ) الى غرفتي والجوع لاعبن بحسبة كرشتي فنظرت الى الكمبيوتر وشغلته فدخلت النت وبدات بتصفح المواقع وفي اثناء ذلك سقطت عيني على اعلان في احد الصفحــات يقول :- "اللي وده يصير بنت ينقر فيذا واللي ماوده يقلب وجهه" وكان في الاعلان ولــد لابس شماغ وتيشيرت ضيق وتنوره نص فخــذ (لايروح بالكم بعيد تراه مهوب جواد),,, انا ومن باب الفضول لا من باب الرغبه رعصت على ذا الاعلان وقلت خلنشوف وش نهايته ,,, واضغط والله وتجيني ذيك الصفحه اللي طلع منها نور قــوي لدرجــة اني دقيت اشارتين يمين يعني طفى النور ,,, ومكتوب فيها" مرحبا بك في عالم الجنس الناعم ,,, مبروك لقد اصبحت فتاة" ,,, انا انهبلت وقلت للصفحه وانا فاق(ن) خشتي .. بلا استهبال انتي وجهتس تكفين عاد مابقى الا انا اصير بنت حدي جدار ويخب علي بعد ,,, عاد ردت علي وقالت ان لم تكن مصدقا طق طق طق طق ( قاعدة تأشر على جدران الغرفه ) قلت لها لا والله مانيب مصدقتس ومانيب مصبخن راسي بالجدار لاني واثق من نفسي رجال حتى شوفي هه ,, والله واروح الحمام ( وانتم بكرامه ) عشان اأكد لها اني رجال ,,, ولكن يوم نظرت لدليلي القاطــع فلم ارى شي,,, واااااااااااااااااااااااااااوك واااااااووك وش ذااا وين رااح ابو الشباب وين طس ؟؟ والله واقعد ادور بالحمام ومالقيته وادور بجيبي ومالقيته ,,, الله من البلشه وين ذلف ذاا ؟ ,, واروح للغرفه وادور بالســريــر يمكنــي ناسيــه يوم قمت من الــنوم واقلب الفـــراش واللحــاف ومهنااش شي : ,, واشوف شي يتحرك قلت اهااا اكيد هذا هو جته الحسرة وبيرجع للباثـروم ,,, والله واقــرب منه لكن للاسف كان هالشـــي هو نفس الفــار اللي بالثلاجـــه بس هالمــره رافع لوحه مكتوب عليها" خخخخخخ يلعن ام النكبه صرت بنت ياوجه الضفدع " قلت للفــار وانا احوس قاعــدن ادور:- والله مانيب فاضيلك ياوجه الفقــر ,, احووووووول وينه ياعالم ترا ابنتحر ,, ترا ابنهبل ( يقالك عاقل الحين ) ,,, وفي تلك الاثنــاء سمعــت صوتا ايقنت ان مصدره هو الكمبيوتر فالتفت اليه فكانت تلك الصفحه اللي مكتوب عليها" خلاص مافي امل ترجع ولد استسلم للامر الواقع ".,,, يوم شفت ذي الكلمات طحت على الارض ( لايشييخ اجل بتطيح على السمااا ؟؟ ) واغمى علـــي ,,,
صحيت من غيبوبتي وانا تافلن العافيه حاس ان وزني زااد وصــار شــي مهوب طبيعــي بجسمــي وانا اللـي احــاول اقوم بس ماقدرت والله وازيد قوة الدفع عشان اقوم واخيرا قمت بعد ماصارت اهتزازات بجسدي ,,, والله واروح للمرايا عشان اشيل الغمص اللي دايــم اشيله بملاســه ,,, واشوف نفسي بالمرايا فمن شدة الدهشــه والدلاختـه عيووونــي طلعت قدااام وكبرت واثمـي صقع بالارض واقول وش ذاا (وش بقيت لتوم جيري ),,, وين شنبي ؟ وين دقني ؟ ووش ذا الجسم الرهيب ,,, بشره بيضااا ,, شفايف حمرا,,, شدوق متورده ,,, صدر بارز ,, شعر طويل ,, خصر نحيل ,,, قلت بروحي والله مايتفوت ذا الجسم لازم اصور نفسي عشان افكربــه بالليل وانا منســـدح (هالسمرمدي حتى نفسه ماسلمت منه ),,, المهــم اني قمت وقفلت باب الغرفـــه ورحت على سريري وبديت اتفحص كل جسمـــي وافصفص اجزاءه فصفصه ,,, ويوم قضيت بديت افكـــر بمستقبلـــي ووشلون ابعلم اهلــي بذي المشكلــه وقلت والله مالها الا اني اواجهم بالحقيقـــه وانا اللــي اقوم البس ملابســي وشديت بفوطــه على صــدري عشان تخف الصدمه على اهلــي والبس جلابيـه طويلـه عشان اخواني السملـــق مايقزون سيقانـــي اللي صارت بلا شعرررر ,,
فتحت باب الغرفه وطلعت منها وانا كلي خوووف وربكه من ردة الفعل اللي بتجــي ,, والله واروح انزل من الدرج ( بالله كل ترااب اجل من وين بتنزل ,, من الخزان ؟!!؟ ) وفي اثناء نزولي من الدرج حسيت بحشرجــه داخل معدتـي ووجــع يصيب بطنـي وصداع احســه في كرشتــي ... استنكرت هذا الشـــي فعندمــا كنت ولدا بالسابــق لم ياتنـي هذا الشعـــور الفضيع وفجأه حسيت اني ابرووح للحمــااام والله واسررع شاااخط ( اسف قصدي شاخطــه ) ماشيه مليون عقده بالساعه وادخل الحمــام وتطلــع مني عــلووم قسنب بالله لو اقولها ان تحــوم تسبودكــم يالعيــاااال ,,,, بس لحد يسالنــي من وين طلــع هالشــي ( الله من يوزر بيستمــر عقب ذاا المقطــع )!!! .... قلت بنفســـي والله الشغـــل مايبيلـــه مــزح وانا اللي اصررررف نفســـي واتهــرب من اهلــي والبس عباة امـــي واقصــد عياده للدكتوره سعــاد ( دكتورة الحـي ) ,,, دخلت على الدكتوره وهي جالستن على الكرسي ( قسنب بالله مارحمــت ذاك اليــوم الا الكرســي اللي قاعدتن عليــه ,,, حسبي الله عليها ساقها الواحد تقل سخانة ,, ولو تشوفها ماتدري هي جالســه على كرســي ولا معلقه بحبــااال ) المراد اني قلت لها على اللي صار من الدرج حتى الحمام ,,, قالت لي :- مافيش مشكلة يابنتي خــودي إطعة الئماش تشيه واربطيها تحت خط الاستواء بس حازري ماتوئعش لما تفوحقين ( تفوحجين ) قلت لهااا تيب يالله مع السلامــه,,, قالت الدكتوره :- لحزه انا نسيت ائولك حاقــه.. قلت وشــي بعــد ؟ قالت ماتنسيش بئا تحطــي مناكيــر بصوابعــك لما تقيكــي الحالــه تشيه عشــان بالماريــه اللي حوليــك بيعرفــوا انتي عندك أيـه.... قلت لها طيب وانتي بعد بالماريـه كولــي تبن .
وانكس لبيتنــا وانا ومنكسرن خاطري واجر مرارة الواقع معــي ,, وادق الجرس ويفتحلي اخوي الصغير هو ونخاريره غادي(ن) وجهه تقل برتسة طحالب ,, قلت له وخر خلنــي ادخل,,, واخــوي مسبــه ماعرف منهــي اللي دخلت ذي فقال وهو ينشــق خشمــه ومطلعــن لسانــه:- اقول ياالحلوه ترى الملحــق فاضــي لو تبين اقلطتس هناك ازين من داخل البيت ماغير سواليف شياب ومتاغــر!!,,, لــم يستطــع اكمال حديثه لاني صكيته بذاك الطراق اللي مارده الا جدار المسجــد ومن زود قوته ماقدر يقشــع خشته من الجدار هذا بفضل نخاريره اللي نشبت ,, بعد بعد يجي هالبزر ويقردن اخته ,,, المهم وادخل البيت والقــى ابوي متسدح بالصالــه ورافع رجليــه على دولاب التلفزيون ويتابــع النشــره الجويــه حقت LBC... وادخل الصاله واتنحنح ,, لكن تنحنحــي من تالــي ماش صار تقــل سواليف قطــااااوه ,,, فالتفت علي ابوي والدهشــه ملأت خشته وبدا به الحارش المارش اللي يخلـي الشايب عقلــه غايب فقال وهو يقترب مني ويميــِل اثمــه بالكـــلام ,, من انتي ياشاطره ووشسمتس؟,,, ووش دخلتس بيتــنا ؟؟ فقلت له وانا مستحيــه:- انـا ولــدك متغربــل يايبه ,, رجع ابي الى مرقده قائلا.. والله والتراب ياوليدي ,, الله من زين العلوم خير وش صــار فيــك؟ ,,, عاد قلتله القصــه كلهـــا ,,, فقـــام ابوي من الصالـــه وطلـــع الدرج وهو يتنهــد ويقـــول ,, على ام(ن) وابو جابوك يالسفلـــه ,,,
الوكـاد وانا جالستن احتــري امــي تطلــع من المطبخ منصدمتن من ردة ابوي البارده اللي مالها داعي السخيفه المقرفه الوعه الكخــه ( عاااادي بنت وتسب فيهاا شي ؟!! ),, المهم وانا انتظر امــي انفتح باب الصالــه واقوم انا واتغطــى ( خلاص عااد صرت بنت اخاف على شرفي ) وينفتح الباب والقــى اخوي الكبير توه جاي من شغلــه بالكبينه ويشوفنــي وهو اللي ضاعت علومــه وصــار يعرررق ( يحق له مازد شاف بنت بهالجمال ) وقال من انتي ؟,, قلت له انا فلانه بنت جيرانكم جيت اشوف امك قال لي والله امي مهيب موجوده هالحيــن ,,, وش رايتس تطلعين معي نطعس على بال ماتجي امي ؟,, قلت له اقطع واخس يالهيس الاربد والله لو اني بايعه عمري اطلع معك بهاالقايلــه المووت ( كمخه ),,, وفي تلك اللحظـــات دخلت امـــي علينــا وهي تقول هووو هوووو ( بفتح الهااء وتسكين الواو ) وش ذا يالسلمــي جالسن مع بنت الجيران بالصالــه يالله قم اندزلــع لا العن جدك الحين ( عاادي ترى امي متربيتن مع جوليــا روبرتس) ,, واشوا ان اخوي ذلف وصفى الجو لــي ولامـــي ,, جت امــي وقالت لي : سمي يابنيتي انتي منهي بنته ,, قلت لها انا بنتتس يا يمه .. قالت وشوووو ؟ وانا اللي ارتمي الى احضانهــا واقعد اصيــح وابكـــي واقوول انا متغربــل يا يمه انا ولدتس الدبشه انا ولدتس الكمخه انا الرخمه الخ الخ الخ ,,, قالت خلاااص ياوليدي تراك قطعت قليبي بذا الحتسي المروح قلي وش صار فيك ؟؟ ,,, فترجلت من احضانها وانا امسح سعابيلي بغدفتــي واقول لها خلاص يا يمه صرت بنت مثلــي مثل هالثلاجــة اختــي الكبيره ,,, وقلت لها كل اللي صار
طاحت امي من هول الصدمه اللي سببت كســر في الشمعات واحتكاكن في الاقمــشه ,,, لكن هذا ماكان مانعن اني اروح لغرفتي واسكر على روحي وافسخ ملابسي حته حته واربط نفســي بفوطــه لحــد صدري والف شعري بمنشفه وارفعها على فوق وانص الحمااااام واتروش ,,, طلعــت من التسبح وتسني بديت حيـــاة جديده فصرت ازاول اعمالي المنزليـــه بكل دقــه ولعـــانة بنوتيه ,, طبعن هاللعانة البنوتيه تعرف بحوس البيت فوق حدر من تغييــر لون البويه واستبــدال الاوانــي وتربيـــة الحيــوانات الاليـــفه ورفــع بورصة شركــة الاتصــالات السعوديه,,, وفي سنة من الايــام كنت جالستن بالمقلــط قاعدتن احط الميك اب اللبنــاني الموجود بمجلة النادي ( قايلين لكم حده جــدار ويخب ) طق باب المقلــط ودخلت امــي ودار بيننا هذا الحوار :-
امي (وقد وضعت يدها على شكل مسدس وملزقتها قدام خشتها ) :- هوووو وش قاعده تسوين يابنيتي ؟؟
انا :- شوفة عينتس ياميمتي العب كيرم خخخخخخ يعني وش قاعده اسوي الله اكبر ماغير تلطيخ بهالخرابيط
امي :- طيب اتركي هاللي بيدتس واسمعيني
انا (وقد جدعت مابيدي) :- خير يمه وش فيه ؟
امي :- توه جاء ابوتس وقالي ان سعد ولد ابو سعد طلب ايدتس ,,, هاا وش رايتس ؟
انا وقد طمبست وجهي للارض واحمرت شدوقي من الحيااا :- والله يا يمه الشور شوركم واللي تشوفونه انا موافقه
وانا اللي اطلع غرفتي واصكر على روحي واقعد اناقــز على سريري فرحانه اني ابعرس واقعد اتخيل ليلــة الدخلـــه انه انا هي انا وزوجي هو المخده وهاتك ياخواطـــر واشعــار من مزعل فرحان لخالد الفيصل ,,, وانا اللي ابدا اتدرب على الحيــاة الزوجيــه ووشلون اطررررش اذا حملــت ,,, ووشلون اطلــع ريحة مخيســه اذا انفست ,,, ووشلون اربي عيالي اذا ولدت ,,,, ووشلون اصيــر دبــه اذا كبرت ,,, ووشلون اصلــي اذا شيبت,,, ووشلون ووشلووون ......
((( طولت ؟!! داري ))))
المهم جت ليلة العرس وكنت جالستن على الكوشــه جمب زوجــي وكل النــاس قدامــي ,, ماغير نناظر خشش الحضور وحدتن ملطختن وجهها بااحمر والثانيه باصفر وهذيتس بازرق ,,, بس اللي قاهرن هالعجوز ذيتس اظن انـهــا كابة(ن) زيت فرامــل وجايتن للعــرس ,, بس اللي لفت انتباهــي وحايســن مريــري هالبزران اللي ماغير يطامروون ويناقزوون علـــى الكوشــه تقل جراااااد ,,, المراد ان زوجي قام من مكــانه ( اجل من مكان اللي بجمبه ؟؟ ) وقالي يالله قومي حبيبتي نطلـع ,, قلت له وانا كلي حيااا اصبر وجع خلنا نستانس ,, قالي زوجــي بكل رقه وحنيه ونمط رومنسي اقول قومي قامت عصبتس ,, ومسك بقووه ويقول قووومي ,, يالله قووومي ,,, وفجأة اختلف صوت زوجي وصار يقول ,, قم قااامت قيامه على ظهرك ,, قم لاتفوتك الصــلاة قم وجع يوجع هالانترنت ماغيــر سهــر ودجــه ,,, قلت انا طيب يا يبه خلاص ابقوم ,,, وتوته توته خلصت الحتوته
مايستفــاد :-
- لاتحب وحده افغانيـــه
- اللي يرســب بالاختبــارات لازم يفحــط
- البعـرصي ولد خالة الضب من الرضاع
- جنــة الاطفــال منازلهـــم
- <<<<< ماااااصل ,, ماااصل ,, مااااااصل
ودمتم سالمين <<< ضحايا قناة غصب واحد واثنين وثلاثه اهلن وسهلن
اولاً احب اهني اعضاء تطويرالحاره واقولهم عساكم على القوة .. و اولاً بس غير اولاً الاولى اهدي هالموضوع الى كل الديدان والصيبان اللي في دميجتي .. واقولهن تراني لاقي(ن) غير الفليت من دوااا .. كما احب ان اهديه الى كل من يصنف روحه الى جنس بني ادم بس محد معطيه حمض
الموضــوع
اجتمعت انا ونفسي بالليل في ملحق البيت وسهرانين ذاك اليوم على تكسير روس بالسوني تو .. مافيه الا سب ولعن جدف لدرجة ان نفسي عصبت مررره وقامت وتفلت على وجهي وقالت .. انت منتب وجه احد يجلس معك .. قلت لها خير يا أم الشباب والله لو اني مغتصبك اشوا ان الدعوه اتاري .. ولا عشان لعبت بخامستس بالون تو .. قالتلي انطم واسكت تراها خايستن معي وواصلتن بطرف خشمي يالله اشوف افتح خشك خلن ادخل فيك وهنك تتن اليوم ترااا الربو مر علي البارح وانا قاعدتن اغسل التسبده باللــي .. يقول ان دخانك خرب حصاد هالموسم وصرت بدل ماتطلع هوااا صايرن تقوطر لا اراديااااً .. قلت انا .. اهاااااا اثره التتن هو سبب التسريب ؟ قالت ايه .. قلتلها خلاص ماعاد اتتن من هاليوم لكن ابعسل من باتسر
رحت لغرفتي وقعدت امارس هوايتي المفضله واللي هي تقطيع رجيلات الخنافس باالقلامه والفراجير .. همن اجمع جثثهم بقوطي فاضي واولع الزقاره واحط راسها جواا القوطي لمدة دقيقه لين مايطلع الدخان مع اذانهم همن اوخر الزقاره واكب الجثث على الارض .. وعيونهم ماتشوف الا النور مافيه الا دردبه بهالزوليه ومع الدرج ومايردهم الا بلاااعة المطبــخ .. ومره من المرات كنت اعطر روحي بفليت وكنت ارش وانا ادور وادور وانا ارش لين مادخت وطحت على حافة الكومدينه واغشى علي وصرت اشوف ولا شي مافيه الاظلماا ودوامات هوائيه .. وشوي واحس بنفسي اني اطير بالغرفه وانا اتلفت يمين ويسار واشوف اطرافي تقصر وكل مالها تقصر زياده ايديني ورجليني واصابعي .. المهم اني صرت واحد قصير بالحيل وفجأة طحت على الارض بس ماحسيت بالم لان جسمي صار صغير ووزني مثل الريشه
قمت من مكاني ولقيت نفسي بمكان فيه ثيل لونه احمر ومركز عليه شي غريب تقل سفينة جمانة اللي بعدنان ولينا .. وكل شي من حوله كبير مررره وقعدت اناظر باللي حولي واقول بنفسي هالمكان ذاا مالوف لي بس وين شايفه .. والله وطاحت عيني على صوره كبيره معلقه على سور وش كبره واجلس اتمقل بصاحب الصوره واقول بنفسي ملامح هالوجه مهيب بعيدتن عن ملامح وجهي .. كل شي فيه كبير .. تقل واحد تناظره من ورا مجهـر .. واخيرن اعترفت ان صاحب الصوره هو انـا .. وان الثيل الاحمر هي زولية الغرفه والسور الكبير هو الجدار وسفينة جمانة سريري.. وانا صرت قزم
بلشت بروحي وماادري وش اسوي .. جيت وطلعت من الغرفه من تحت الباب بدون مايحك راسي بطرفه وصرت اتمشى ببيتنا بدون محد يدري .. لكن فجاة حسيت ان فيه زلزال صاير واهتزت الدنيا عندي وصرت اناقز من قوته واصبخ بالجدار واتشقلب بالهواا .. وشوي واشوف اخواني الصغار السبعه راكضين ومارين من جنبي وقتها عرفت ان الهزه كانت بسبة هالتسلاب كل واحد كرشته اكبر من الثاني .. لو يشوفهم الواحد واقفين جمب بعض ظنهم باصات نقل بنات .. وانا من حظي الردي صرت احس باي شي .. قلت بنفسي والله الشغله ماتخارج لازم اطلع من هالبيت قبل محد ياطاني واصير بترول بعد ثلاث شهور .. وشوي وانا اللي اسمع واحد يقول : وين تطلع وانا موجود ؟ التفت على ورااا ولقيت قملتين شايلين خنفس من الخنافس على نقاله ومودينه جحره .. عرفت انه واحد من الضحايا حقين عملية الزقاره .. وهو اللي يقول للقملتين امسكووووه ولايفلت منكم وتراني محللن دمه واللي يجيبه لي حي ابعطيه روث بعير واللي يجيبه ميت ابعطيه روث حدى خوانه .. انا جتني النفاضه وصرت اراكض بسرعه والقمل وراي شاخط .. ولاعاد صرت اركز ومدري وين اروح والبيت صاير يضيع وانا قزم .. ابي القى باب الشارع بس مالقيته كل مادخلت من تحت باب لقيت روحي يافي حمام ولا في مستودع ولا في غرفة شغاله .. والقمل الله يلعن جدفه وراي عيااا ياقف وانا مسرع واركض وهو وراي داعس مليون لدرجة ان عيوني صارن لونها ابيض راح السواد اللي فيها من زود السرعه وفجاة طحت بحفره والتفت على فوق والقى القمل متعديني وصابخ بحديده يوم طلعت منها لقيت اني بحفرة حديد باب القراش والقمل مدروخ ويدور فوق راسه سيارات وعصافير ( صورة وجه واحد يدور فوق راسه سيارات وعصافير )
اشوا اني طلعت من هالبيت قسمب بالله تقل ملاهي .. والله واسترحت وتنفس الصعداء << ودي اقولها باي طريقه .. وصرت اتمشى بالشارع وكان فاضي ماعدا ذاك الشي اللي طوله مثل طولي وكان حاطن رجل على ركبه وقاعد يتتن .. رحت لمه ابي احاتسيه واكلمه واقوله من انت ؟ قالي .. قل من انتي مهوب من انت ! قلتلها طيب من انتي ؟ قالت انا الدوده .. قلتلها الدوده حقت لعبة الرهيب ولا العنيد ؟ .. قالت حقت الناس ياثور قلتلها طيب وش اللي موقفك هنا .. قالتلي ابد ولا شي بس اني احتري واحد خكري بيمر عقب شوي ابدخل فيه .. قلتلها الله يستر علينا وعليتس يالله سلام .. واخذ طريقي وامشي وشوي والا اسمع صوت صرااخ وفجأه سكوت عرفت بعدها ان الدوده لقت ضالتها ..
واقعد افكر وافكر وش اسوي بهالجسم القزم .. قلت بنفسي ليه ماادخل بحدا الكمبيوترات واشوف الفيروسات هاللي مبهذلتن بالعالم .. والله وارجع لبيتنا وادخل الغرفه وهذاني ابشغل الكمبيوتر لكن مسك ايدي واحد من الخنافس ولواها على ورااا وقاعد يهاوش ويصارخ .. ليه تقعد تقطع رجيلات اهلي وتهبلبهم .. قلت له انا ماسويت شي والله .. قال انطم ولا يكثر وامش قدامي الحين يبونك الجماعه .. فكيت ايدي منه وقلتله شف يبووو الشباب ترا اسطرك تسطييير .. واجي انا واخذ قشر فصفص من الارض واهفه على قفاه ومارده الا فتحة الديسك .. نفضت ايديني ورحت شغلت الكمبيوتر ودخلت فيه من ورااا بعد ماقشعت فيش الشاشه
صرت اتمشى بالكمبيوتر واشوف الصور اللي فيه .. وشوي الا واحدن دقني مع كتفي بقوه وشكله ناوي حرررش من البدايه .. التفت عليه وقلت له .. خير من انت ؟ قالي انا فيروس اللوف ( ياقدمي بعد ) .. قلتله بالله مالقوا فيروس الحب الا انت .. ياخي وجهك مايأهل .. اول ماشفتك حسبتك جراد يستهبل .. قالي لايكثر ياوجه النعله واحترم عمك .. قلتله مايخسى الا انت .. ومن هنا وهنا بدينا نتهاوش ومادريت الا بزبيريه تهفني وتصقع بالفيروس .. التفت على وراا ولقيته واحد كبير وشكله عاقل .. قاعد يقول كم مره قلتلك يا لوف لاتصير بثر واحترم الضيوف .. انا استانست على هالطيب وقلتله من انت ؟ قالي انا النورتن .. قلت والله والنعم تصدق اني حبيتك .. قال وتصدق انك حمار .. قلتله شدعوه زعلت .. قال لايكثر يالبزر وضف اغراظك وانقلع براا الجهاز محناب فاضين لك عندنا هاليومين ملفات واجده تبي من يدلتها .. قلت له زين خلاس بتلع
طلعت من الجهاز ورجعت فيش الشاشه مكانه وجيت ابنط على الارض بس لقيت الخنفس ابن الكلب واقفلي يحتريني وبيده سكينتين يلحمها ببعض ويطلع من اثمه سعابيل .. والله والبلشه مع هالخنفس وش السواة معه قلت بنفسي مدام الشغله موت .. فانا ميت ميت اليوم ولا بكره .. والله ورحت لمه ومسكني وتلني مع علباتي على خوياه واجتمعوا حولي وربطوني بشماغ لا والله بغتره ( يرجال عاقت على ذي كمل بس ) وجاا واحد وصار يقول اسماء الخنافس اللي مذبحهم طول حياتي ..( والله لو يقول كل الاسامي كان ماذبحوني الا عقب سبع سنين ) .. وجا الوقت الحاسم وقربوا حبل المشنقه واللي كان خيط ممزوع من شمغ حدى اخواني وكنت واقف على زرار ثوب والخنفس اللي بيدفه واقف جنبي وقالي يالله تشهد .. قلت له يالله تشهدت بس اخلص تكفى دف الزرار .. وهو اللي يدف من هنا وانا اللي اطيح من سريري .. ويرجع كل شي لوضعه الطبيعي ولامن شاف ولا من دري .. بس اول ماقمت رحت ودورت على هالخنفس الللي مخرعني طول هالحلم واستسمحت منه .. همن رحت لباب القراش وانقذت القملتين اللي عنده .. بعدين رحت للولد الخكري اللي فيه الدوده وقلتله ترا الدوده اللي فيك تتتن .. وهمن رحت وفرمت جهازي من فيرس اللوف .. وهذه خنبقتي في هذا اليوم
مايستفاد من الموضوع :-
اذا كنت بتقتل صرصار فاستخدم زبيريه واقتله جميع .. و مايصيربك مثل ماصار فيني 11月12日 السلام عليكم ..
نتوقف لاداء الاختبارات
ملاحظه:-
اسمعوا اللحن حق نشيد (انين السكون) يشبه اي اغنيه !!0
ههههههههههههههههههههههه
11月9日 .
<<<<<<<<<<<<>>>>>>>>>>>>> 10月28日
|
السلام عليكم ورحمة الله وبركاته
ادري انكم تفاجئتوا من هالتغيير المنقطع النظير الوان غير وستايل غير .. تحسون اني راضعن مع جني على هالالوان .. حتى انا يوم شفت هالشكل الجديد شكيت اني زلابه مسوي داشر خخخخخ
على العموم .. هو جديد السبيس هذا .. وانتظرونا على احر من الجمر وليتكم بعد تاطون عليه كودكم تنحرقون وافتك بلا سبيس بلا هم !!هههههههه
<-- اللي يسمعك يقول ماسكين صف العالم!!
برررررررررررررررررب
السبب/ تركيب سقالة للسبيس
|
|
工具 
帮助
